城中鏡：葉茂林淚憶奮鬥 愛拚才會贏
香港城市大學同香港浸會大學尋日分別舉行榮譽院士頒授典禮與支票捐贈儀式。芥籽園基金主席陳家駒同曾任職多個政府部門的前「AO一姐」黎高穎怡（Rebecca）雙雙獲頒城大榮譽院士；浸大則獲耀才證券主席葉茂林捐助八百萬港元，葉茂林致詞時仲一度因感懷身世而淚灑當場，場面感人。
葉茂林致詞時感懷身世，淚灑當場。
黎高穎怡（中）獲好友區璟智（右）及王榮珍到賀。
陳家駒獲頒城大榮譽院士。
講起個人奮鬥史，葉回憶自幼家境清貧，一家六口瞓埋一張碌架床，佢要穿膠花幫補生計被迫中途輟學，令搵工更加難，無計可施下做過小販維生。作為家中長子嘅佢負起家庭經濟重擔，生意一冇著落就要成家一齊捱餓，佢好自責，成日會匿喺廁所撼頭埋牆，或喺被窩中哭泣，好彩最終佢搵到自己一片天。熱爆臺灣名曲《愛拚才會贏》當中「三分天注定，七分靠打拚」嘅歌詞，更令佢畢生難忘。佢話，根本冇天注定，全靠自己打拚，所以學生若想成功一定要努力，僥倖富貴唔會長久。
三前女高官興奮聚首
另一邊廂，城大頒授榮譽院士現場都好熱鬧，財經事務及庫務局前常任秘書長區璟智同創新科技署前署長王榮珍都去捧Rebecca場。Rebecca同王榮珍係中學同學兼世交，區璟智就係Rebecca當年結婚時嘅伴娘，三位姊妹淘聚首時特別興奮。
區璟智又自爆，當年做伴娘係佢呢世人著得最隆重嘅一次，連自己結婚都只係著西服咁話喎！講講嚇，三人話仲未試過一齊去旅行，既然大家都退咗休，遲啲一齊去旅行都唔定喎！
